Thursday, December 23, 2010

ការគ្រប់គ្រងនិងការបែងចែករដ្ឋបាល

          ខ័ណ្ឌ​ព្រៃនប់​បច្ចុប្បន្ន​ស្ថិត​នៅ​ក្រោម​ការ​គ្រប់គ្រង​របស់​ក្រុង​កំពង់សោម (ក្រុង​ព្រះសីហនុ)។
          ក្រុង​ទាំង​មូល​មាន​ខ័ណ្ឌ​ជា​ចំណុះ​ចំនួន​បី​គឺ ៖
              - ខ័ណ្ឌ​ព្រៃនប
              - ខ័ណ្ឌ​ស្ទឹងហាវ
              - ខ័ណ្ឌ​មិត្តភាព
          ខ័ណ្ឌ​ព្រៃនប់​កាល​ពី​ជំនាន់​មុន​ៗ គឺ​ជា​ស្រុក​មួយ​នៃ​ខេត្ត​កំពត។ ក្រោយ​មក នៅ​ជំនាន់​រដ្ឋ​កម្ពុជា នា​ឆ្នាំ ១៩៨២ ដោយ​យល់​ឃើញ​ថា ក្រុង​នេះ​មាន​សារសំខាន់ ហើយ​អាច​អភិវឌ្ឍន៍​ឲ្យ​មាន​ស្ថានភាព​ល្អ​ប្រសើរ ព្រម​ទាំង​ការ​គ្រប់គ្រង​មាន​ស្ថានភាព​ទូលាយ ទើប​រដ្ឋ​អំណាច​ជំនាន់​នោះ​បាន​សម្រេច​កាត់​ស្រុក​ព្រៃនប់​នេះ​ពី​ខេត្ត​កំពត មក​បញ្ចូល​ទៅ​ខាង​ក្រុង​ព្រះសីហនុ​ធ្វើ​ជា​ខ៍ណ្ឌ​ទៅ​វិញ។ ក្នុង​ចំណោម​ខ័ណ្ឌ​ទាំង​បី​របស់​ក្រុង គឺ​មាន​តែ​ខ័ណ្ឌ​ព្រៃនប់​ទេ ដែល​មាន​ពួក​ជនជាតិ​ស្អូច​រស់​នៅ។ ពួក​គេ​ស្នាក់​នៅ​ភូមិ​សំរុង​លើ​នៃ​ឃុំ​សំរុង។ ការ​រស់​នៅ​របស់​ពួក​ស្អូច ព្រម​ទាំង​ការ​គ្រប់គ្រង មិន​អាស្រ័យ​លើ​មេ​កន្ទ្រាញ​ឡើយ គឺ​ស្ថិត​នៅ​ក្រោម​ការ​ដឹកនាំ និង​មើល​ការ​ខុស​ត្រូវ​ពី​ប្រធាន​ភូមិ​ខ្មែរ ឬ​ស្អូច។ រាល់​ទំនាក់ទនង​រវាង​រដ្ឋបាល ភូមិ ឃុំ ខ័ណ្ឌ ក្រុង គឺ​មាន​លក្ខណៈ​ល្អ អាស្រ័យ​ដោយ​ផ្លូវ​គមនាគមន៍​អំណោយ​ផល​សម្រាប់​កិច្ចការ​នេះ។ កាល​ជំនាន់​រដ្ឋ​កម្ពុជា ភូមិ​ដែល​ស្អូច​រស់​នៅ​គឺ​មាន​ការ​លំបាក​យ៉ាង​ខ្លាំង បណ្តាល​មក​ពី​សង្គ្រាម ដូច​ជា​បញ្ហា​សន្តិសុខ​ដែល​ខ្មាំង​សត្រូវ​តែង​តែ​មក​យាយី ឆក់​ប្លន់​ទ្រព្យ​សម្បត្តិ និង​កាប់​សម្លាប់​ពួក​គេ​ស្ទើរ​តែ​រាល់​ថ្ងៃ។ ហើយ​ពួក​ស្អូច​មួយ​ចំនួន​ធំ ពិសេស​ប្រុស​ៗ ត្រូវ​ជាប់​កំណែន​ទ័ព ឈ្លប នគរបាល​ការ​ពារ​ភូមិ ឃុំ ខ្លះ​ជួយ​បំរើ​ការងារ​ស៊ីវិល​ក្នុង​ខ័ណ្ឌ​...។ ឥឡូវ​បន្ទុក​ទាំង​នេះ​ត្រូវ​បាន​គេ​រំសាយ​អស់​ហើយ ព្រោះ​សន្តិសុខ​នៅ​តំបន់​នេះ​មាន​លក្ខណៈ​ល្អ​ប្រសើរ។ ប្រធាន​ភូមិ ឃុំ ជា​អ្នក​ដោះស្រាយ​រាល់​បញ្ហា​ផ្សេង​ៗ ដែល​កើត​មាន​ចំពោះ​ប្រជាជន​ជា​យថាហេតុ ព្រម​ទាំង​ធ្វើ​របាយការណ៍​ឡើង​ទៅ​ខ័ណ្ឌ និង​បញ្ជូន​បន្ត​ទៅ​ក្រុង។
          ក្រៅ​ពី​កិច្ចការ​ខាង​លើ ប្រធាន​ភូមិ​មាន​សិទ្ធិ​ទទួល​បន្ទុក​ការងារ​ផ្សេង​ៗ មាន​ការងារ​រដ្ឋ និង​ការងារ​ផ្ទាល់​ក្នុង​ភូមិ​របស់​ខ្លួន ដូច​ជា​ផ្នែក​រដ្ឋបាល ដើរ​ធ្វើ​ស្ថិតិ​ប្រជាជន​ក្នុង​ភូមិ​ជា​ដើម៕