Monday, January 17, 2011

ប្រជាជន

     ២. ប្រជាជន
          ចំពោះ​ប្រជាជន​ស្អូច កាល​ពី​មុន​ក៏​ដូច​ជា​បច្ចុប្បន្ន ថ្វី​ដ្បិត​តែ​មាន​ការ​វិវត្តន៍​ពេល​វេលា​ក្តី ក៏​កត្តា​នៃ​ចំនួន​មនុស្ស​កើត​គ្មាន​ការ​កើន​ឡើង​ទេ គឺ​ស្ថិតិ​នៃ​ជនជាតិ​នេះ​ដូច​ពី​មុន​ដដែល។
          តាម​លោក Taillard(៨) មាន​ស្អូច​ចំនួន ៧៥ នាក់នៅ​ក្នុង​ឆ្នាំ ១៩១០ និង​ចំនួន ១០០ នាក់​នៅ​ក្នុង​ឆ្នាំ ១៩២៦។ ស្រី ភិវ ដែល​ជា​មនុស្ស​ចេះ​ដឹង​ក្នុង​ចំណោម​ពួក​គេ​នោះ​បាន​ប្រាប់​ថា ៖ កាល​ជំនាន់​សាធារណរដ្ឋ​ខ្មែរ ពួក​គាត់​មាន​ចំនួន ១៤៦ គ្រួសារ គិត​ជា​ចំនួន​មនុស្ស​មាន ២៦៤ នាក់។ សម័យ​ប៉ុលពត ប្រជាជន​គាត់​មួយ​ចំនួន​បាន​ទទួល​រងគ្រោះ​ដូច​ប្រជាជន​ខ្មែរ​យើង​ដែរ ត្រូវ​រងគ្រោះ​ការ​កាប់​សំលាប់​បង្ខំ​ឲ្យ​ធ្វើ​ការ​ជា​ទម្ងន់ និង​បង្អត់​អាហារ​ត្រូវ​ស្លាប់​អស់​ជា​ច្រើន។
          ជំនាន់​រដ្ឋកម្ពុជា ប្រជាជន​គាត់​មួយ​ចំនួន​ត្រូវ​ទទួល​រងគ្រោះ​ដោយសារ​សង្គ្រាម ហើយ​និង​ត្រូវ​ជាប់​កំណែន​ទ័ព ធ្វើ​នគរបាល ឈ្លប​ភូមិ​ឃុំ អាស្រ័យ​ជំនាន់​នោះ​តំបន់​នេះ​ជា​តំបន់​អសន្តិសុខ ដែល​ខ្មាំង​សត្រូវ​តែងតែ​មក​យាយី​ដុត​បំផ្លាញ​ជា​រៀង​រាល់​ថ្ងៃ។ មួយ​ចំនួន​ត្រូវ​ស្លាប់​ក្នុង​ពេល​ប្រយុទ្ធ ខ្លះ​ត្រូវ​ជាន់​មីន​ស្លាប់ និង​របួស​ជា​ច្រើន។
          ក្រោយ​ការ​បោះឆ្នោត​ឆ្នាំ ១៩៩៣ ភូមិ​ស្រុក​នេះ​បាន​ទទួល​នៅ​សន្តិភាព​ពេញ​លេញ ហើយ​ចំនួន​ប្រជាជន​គិត​មក​ដល់​ឆ្នាំ ១៩៩៧ នេះ​គឺ​មាន​ចំនួន ៩០ នាក់​គិត​តាំង​ពី​កុមារ វ័យជំទង់ និង​មនុស្ស​ចាស់៕
------------------------------
(៨) Taillard (1964 page 160)